Sólheimakirkja
Öflugt trúar- og menningarstarf er í Sólheimakirkju allt árið. Messuhald er mánaðarlega og einnig á hátíðisdögum. Jóla og gamlársdagsmessur eru afar vel sóttar. Kirkjan er
einnig nýtt fyrir giftingar, skírnir, fermingar og aðrar athafnir.
Sólheimakirkja er í Skálholtsprestakalli. Sóknarprestur er Sr. Kristín Þórunn Tómasdóttir.
Við Sólheimakirkju er kirkjugarður sem var vígður 2014. Vörslumaður garðsins er Sesselja Hreindís Sigmundsdóttir stofnandi Sólheima. Í samráði við fjölskyldu Sesselíu voru jarðneskar leifar hennar og barna hennar, Huldu Hermannsdóttur og Elvars Björns Sigmundssonar, fluttar úr Fossvogskirkjugarði í Kirkjugarðinn á Sólheimum árið 2014. Við þá athöfn var kirkjugarðurinn vígður. Í garðinum er einnig minnisvarði um látna íbúa sem hvíla fjarri Sólheimum.
Kirkjuklukkurnar í Sólheimakirkju ramma inn daginn á Sólheimum. Á virkum dögum hringja þær klukkan 09:00 og hefst þá morgunfundurinn. Þær hringja svo aftur klukkan 12:00 þegar matartíminn hefst og svo í lok vinnudags klukkan 16:00.
Ríkulegt menningarstarf er í Sólheimakirkju. Reglulega eru haldnir tónleikar í kirkjunni enda hefur hún einstakan hljómburð og er búin flygli og orgeli. Fjöldi kóra leggur leið sína á Sólheima til æfinga og tónleikahalds í kirkjunni. Á Menningarveislu Sólheima, sem stendur frá byrjun júní og fram í ágúst, eru tólkeikar í kirkjunni alla laugardaga.
Það eru öll velkomin í Sólheimakirkju.
Fyrir frekari upplýsingar um kirkjuna, starfið í henni og afnot, vinsamlegast hafið samband við solheimar@solheimar.is
Altaristaflan
Altaristaflan í kirkjunni er eftir listamanninn Ólaf Má Guðmundsson, sem vann lengi sem fagstjóri Listasmiðju Sólheima.
Altaristaflan var vígð við hátíðarguðsþjónustu þann 4. júlí 2010 á 80 ára afmæli Sólheima.
Altaristaflan er gerð úr þæfðri íslenskri ull. Hún er hönnuð, útfærð og unnin af Ólafi Má með hliðsjón af hugmyndum íbúa Sólheima.
Biblíutextinn sem unnið var út frá er Mark. 10: 13-16 :
Slíkra er Guðs ríki
13 Menn færðu börn til Jesú að hann snerti þau en lærisveinarnir átöldu þá.
14 Þegar Jesús sá það sárnaði honum og hann mælti við þá: „Leyfið börnunum að koma til mín, varnið þeim eigi því að slíkra er Guðs ríki.
15 Sannlega segi ég ykkur: Hver sem tekur ekki við Guðs ríki eins og barn mun aldrei inn í það koma.“
16 Og Jesús tók þau sér í faðm, lagði hendur yfir þau og blessaði þau.
Myndir frá hátíðarmessu 4. júlí 2010 þegar altaristaflan var vígð.
Ólafur Már Guðmundsson
Kirkjuklukkurnar
Kirkjuklukkurnar í Sólheimakirkju ramma inn daginn á Sólheimum.
Á virkum dögum hringja þær klukkan 09:00 og hefst þá morgunfundurinn. Þær hringja svo aftur klukkan 12:00 þegar matartíminn hefst og svo í lok vinnudags klukkan 16:00.
Kirkjuklukkurnar eru þrjár:
Stærsta gefur tóninn G – á hana er ritað: SOLI DEO GLORIA
Önnur gefur tóninn A – á hana er ritað: LIFUM Í KRISTI
Þriðja gefur tóninn C – á hana er ritað: FÖGNUM Í DROTTNI
Klukkurnar voru gefnar af sjóði sem stofnaður var af vinum Péturs Sveinbjarnasonar, fyrrum stjórnarformanns Sólheima, í tilefni af 60 ára afmælis hans 23. ágúst 2005.
Hringibúnaðinn og uppsetninguna kostuðu Sólheimar og Styrktarsjóður Sólheima.
Klukkunum var hringt fyrst við guðsþjónustu 9. júlí 2006.
Nokkrar staðreyndir um Sólheimakirkju
- Kirkjan var vígð 3. júlí 2005
- Arkitekt Sólheimakirkju er Árni Friðriksson hjá ASK arkitektastofu í Reykjavík
- Aðrir hönnuðir eru Jón Guðmundsson verkfræðingur og Þór Stefánsson rafmagnstæknifræðingur
- Fyrsta skóflustunga að Sólheimakirkju var tekin 30. júní árið 2000 af frú Magneu Þorkelsdóttur og dr. Sigurbirni Einarssyni biskupi
- Kirkjan var vígð af Herra Karli Sigurbjörnssyni biskupi Íslands, þann 3. júlí árið 2005, á sjötugasta og fimmta afmælisári Sólheima
- Framkvæmdir hófust í ágúst árið 2002
- Sólheimakirkja er 238 m2 að stærð, rúmtak hennar eru 1160 m3
- Veggir eru steinsteyptir með torfhleðslu að utan. Þak kirkjunnar er úr timbri klætt með þakpappa og rekavið. Burðarvirki í þaki eru límtré
- Efnisval til byggingarinnar er í samræmi við þá stefnu Sólheima, að nota vistvæn efni
- Kirkjan rúmar 168 manns í sæti niðri en á lofti er aðstaða fyrir 26 manns, samtals 194
- Í anddyri er skrúðhús, fatahengi, salerni, ræsti- og tengiherbergi
- Umsjón með smíði kirkjunnar höfðu þeir Agnar Guðlaugsson þáverandi framkvæmdastjóri Sólheima og Þorvaldur Kjartansson húsasmíðameistari
- Kirkjan er í Mosfellsprestakalli. Sóknarprestur er Sr. Kristín Þórunn Tómasdóttir
- Altaristaflan er hönnuð, unnin og útfærð af Ólafi Má Guðmundssyni, með hliðsjón af hugmyndum íbúa Sólheima. Altaristaflan var vígð 4. júlí 2010
- Sr. Helga Helena Sturlaugsdóttir var ráðin prestur á Sólheimum í nóvember 2004 og þjónaði fram í september 2005
- Sr. Birgir Thomsen var vígður til starfa sem prestur Sólheima í október 2005 og þjónaði til 31. des. 2015
- Sr. Jóhanna Magnúsdóttir var vígð til Sólheima 15. nóvember 2015 og starfaði þar fram í ágúst 2016
- Sr. Sveinn Alfreðsson var ráðin sérþjónustuprestur til Sólheima frá 1. september 2016 – 2019
- Frá 2019 hafa sóknarprestar Skálholtsprestakalls annast guðsþjónustur í Sólheimakirkju.
- Kirkjan er fjármögnuð af Styrktarsjóði Sólheima með peninga og efnisgjöfum einstaklinga og fyrirtækja. Kirkjan var skuldlaus á vígsludegi
- Eigandi og ábyrgðaraðili að rekstri kirkjunnar eru Sólheimar
Aðventugarðurinn
Aðventugarður Sólheima er íbúum mikils virði og einn af hornsteinum menningarsamfélagsins. Aðventugarðurinn er ávallt fyrsta sunnudag í aðventu og aðeins fyrir íbúa og starfsfólk Sólheima. Mikið er lagt upp úr hátíðleika athafnarinnar.
Aðventugarðurinn er hljóðlát og hugleiðandi athöfn sem á rætur sínar að rekja til Waldorfskólanna. Sesselja Hreindís Sigmundsdóttir stofnandi Sólheima kynntist þessari hefð í námsdvölum sínum í Evrópu.
Aðventugarðurinn er spírall úr gróðri og í miðju hans stendur stórt kerti á fæti. Athöfnin fer þannig fram að þátttakendur ganga, einn í senn, með kerti sem komið hefur verið fyrir í epli að stóra kertinu í miðju garðsins. Þar tendra þeir kertið og koma því síðan fyrir í spíralnum á leið sinni út úr honum.
Með þessum hætti lýsist aðventugarðurinn smám saman upp og minnir á ljósið sem hvert og eitt okkar þarf að bera innra með sér í skammdeginu.
Eplin tákna jörðina og ávexti hennar. Lifandi hljóðfæraleikur veitir athöfninni hátíðlegan blæ.
Myndirnar eru frá Aðventugarðinum árið 2008.
Tónleikar
Ríkulegt menningarstarf er í Sólheimakirkju. Reglulega eru haldnir tónleikar í kirkjunni enda hefur hún einstakan hljómburð og er búin flygli og orgeli. Fjöldi kóra leggur leið sína á Sólheima til æfinga og tónleikahalds í kirkjunni.
Á Menningarveislu Sólheima, sem stendur frá byrjun júní og fram í ágúst, eru tólkeikar í kirkjunni alla laugardaga.
Myndirnar tók Leifur Þór Ragnarsson af tónleikum Páls Óskars og Diddú á Menningarveislu Sólehima 2024.
