Troðfullt Sólheimaleikhús

Troðfullt hús í Sólheimaleikhúsinu

Sannkallað sumarveður lék við gesti á Sólheimum þegar leikfélagið frumsýndi leikverkið Leitin að sumrinu á sumardaginn fyrsta, 25. Apríl. Sýningin fékk frábærar viðtökur og höfðu gestir orð á því að þetta væri besta sýning leikfélagsins í fjölda ár, að öðrum ólöstuðum. Það var uppselt á frumsýninguna og í raun var húsið troðfyllt. Leikhópurinn þurfti að breyta sýningunni örlítið vegna húsfyllis en ekki var mögulegt að komast út í salinn fyrir leikarana. Gestir nutu svo kaffi og meðlætis í veðurblíðunni á Grænu könnunni að sýningunni lokinni. Tvær sýningar verða um helgina  og eru því aðeins fimm sýningar eftir.  

Leitin að sumrinu fjallar um hann Jón sem þekkir ekki annað en eilíft sumar. Dag einn fara skrýtnar persónur að ryðjast inn í líf hans, hver á fætur annarri og skipta um árstíðir. Jón er í fyrstu alls ekki sáttur við þessar breytingar, en lærir smám saman að hver árstíð hefur sína kosti og galla. Höfundar eru leikstjórinn Guðmundur Lúðvík Þorvaldsson ásamt Ástþóri Ágústsyni og Magnúsi Guðmundssyni og tónlistina semur Hallbjörn V. Rúnarsson forstöðuþroskaþjálfi á Sólheimum. Rúmur helmingur íbúa og starfsmanna Sólheima koma á einhvern hátt að sýningunni.

Þessi sýning, eins og aðrar, hjá Leikfélagi Sólheima er einstök á svo margan hátt. Það eitt að geta haldið úti starfandi leikfélagi í svona litlu byggðahverfi er einstakt en tilgangur þess er líka örlítið frábrugðinn öðrum leikfélögum, að efla þátttöku fatlaðs fólks í leiklist. Í farsælu samstarfi félagsins við Guðmund Lúðvík, leikstjóra, hefur sú venja skapast að á fyrri hluta æfingatímabilsins er mátað í hlutverkin og handritið mátað að hópnum, eða jafnvel skrifað og svo sniðið að þörfum og óskum hópsins. Allir leikarar eru þvi þátttakendur í skapandi ferli sem er dýrmætur hluti af þátttökunni. Það sama á við um tónlistina. Hún er skrifuð samhliða æfingaferlinu og höfundur sækir innblástur í óskir, væntingar og smekk leikaranna.

Ennþá er hægt að fá miða á sýninguna á morgun og sunnudag 847 5323
1. maí. 4. maí laugardag og sunnudaginn 5 maí er lokasýningin kl. 14:00 eins og alla sýningardaga. Sýningin hentar öllum aldri en börn eru sérstaklega velkomin. Hægt er að panta miða í símanúmerinu 847 5323.

 

 

FACEBOOK

PÓSTLISTI

VEÐUR

 
 
Sólheimar sjálfbært samfélag | 801 selfoss | Iceland | Sími: 422 6000 | solheimar@solheimar.is