Sigurjón Örn nýr stjórnarformaður Sólheima

Sigurjón Örn Þórsson var kjör­inn nýr stjórn­ar­formaður Sólheima á aðal­fundi sjálfseignastofnunarinnar í gær. Pétur Sveinbjarnarson, fyrr­ver­andi stjórn­ar­formaður, hafði tilkynnt stjórn sjálfsseignastofnunarinnar að hann sækt­ist ekki eftir endurkjöri. Margrét Tómasdóttir bauð sig einnig fram í embætti stjórnarformanns.

Ný stjórn var sjálf­kjör­in og í henni sitja auk Sigurjóns, Magnús Ólafsson,  Sigríður Jóna Friðriksdóttir, Hildur Ómarsdóttir og Ómar Einarsson. Arna Einarsdóttir kemur ný inn í stjórn sem varamaður og tekur við af Óðinni Helga Jónssyni sem sóttist ekki eftir endurkjöri.

Sigurjón Örn Þórsson hefur setið stjórn Sólheima í 6 ár.  Sigurjón hefur m.a. sinnt starfi aðstoðarmanns félagsmálaráðherra, formennsku í félagsmálaráði Kópavogs og var formaður stjórnar Framkvæmdasjóðs fatlaðra.  Sigurjón er stjórnmálafræðingur að mennt og er í dag framkvæmdastjóri rekstrarfélags Kringlunnar.  

Á aðal­fund­inum var fjallað um erfiða rekstrarstöðu Sólheima og þá umfjöllun sem birst hefur í fjölmiðlum á undanförnum mánuðum. Það var niðurstaða fundarins að vinna markvisst að því að bæta starfseminina meðal annars með auknu samtali við alla hagsmunaaðila Sólheima og í samræmi við niðurstöður þjónustukönnunar sem unnin var af óháðum ráðgjafa. Á fundinum var Pétri Sveinbjarnarsyni þakkað fyrir gott samstarf og hans framlag í uppbyggingu Sólheima.

Pétur Sveinbjarnarson þakkaði stjórnarmönnum og starfsfólki fyrir gott og farsælt samstarf í gegnum árin á aðalfundinum. „Ég vil einkum þakka íbúum Sólheima fyrir einstaklega góða samveru síðustu 38 ár. Það hefur verið virkilega gefandi að koma að uppbyggingu Sólheima og halda arfleið Sesselju á lífi en Sólheimar er nú elsta sjálfbæra samfélagið í heiminum og hér hefur verið unnið mikið brautryðjanda starf,“ sagði Pétur.

„Það er ánægjulegt að fá tækifæri til að taka við stjórnarformennsku þar sem það er mikill og samhentur vilji hjá stjórninni og stjórnendum að efla starf Sólheima til framtíðar. Meginmarkmið Sólheima er að skapa samfélag sem veitir öllum íbúum tækifæri til að vaxa, þroskast og að vera nauðsynlegur og virkur þátttakandi í samfélaginu. Ég vil leggja áherslu á aukið samtal meðal íbúa og hagsmunaaðila til að styrkja stöðu Sólheima þannig að hlúið sé að þörfum allra á Sólheimum,“ sagði Sigurjón Örn Þórsson.

Um Sólheima

Sesselja Hreindís Sigmundsdóttir stofnaði Sólheima árið 1930 á 28 ára afmælisdegi sínum. Starf Sólheima byggir á starfi og hugsjónum hennar en hún var frumkvöðull í lífrænni ræktun, ekki aðeins á Íslandi heldur líka á Norðurlöndum og er á meðal þeirra fyrstu á Íslandi sem létu sig umhverfismál varða. Sólheimar starfa eftir alþjóðlegum markmiðum samtaka sjálfbærra byggða, Intentional communities  og Global Ecovillage Network.

 

Nánari upplýsingar veitir;

Sigurjón Örn Þórsson, stjórnarformaður Sólheima

Sími 820 3300
 

FACEBOOK

PÓSTLISTI

VEÐUR

 
 
Sólheimar sjálfbært samfélag | 801 selfoss | Iceland | Sími: 422 6000 | solheimar@solheimar.is