Heilunarskólinn mun standa fyrir kyrrðardögum að Sólheimum í Grímsnesi í vetur og verður dvalið í kyrrðinni í 5 daga í senn frá fimmtudegi til mánudags.
Kyrrðardagar verða 2var í vetur, þeir fyrri frá 22. til 26. október og þeir seinni frá 11. til 15. febrúar 2010.
Auk þess verður hugleiðsluhelgi í Sólheimum helgina fyrir páska 26. til 28. mars þ.e. í byrjun bænaviku.
Kyrrðardagarnir verða byggðir á Centering prayer - kyrrðarbæn, hugleiðslu og heilun.
Upplýsingar og skráning á Kyrrðardaga eru á sigrun@heilunarskolinn.is  og í síma 555 1727.

Flestir þekkja til og hafa jafnvel reynslu af hugleiðslu og heilun.  Færri þekkja hins vegar  til Centering prayer eða kyrrðarbænar og verður hér í fyrsta skipti boðið uppá að vinna með þessar 2 leiðir saman, þ.e. andlegu leiðina og trúarlegu leiðina sem báðar leiða okkur til þess sama, þ.e. er að finna Guð innra með okkur.

Centering prayer - kyrrðarbæn

Íhugun var þáttur i andlegri iðkun og uppbyggingu kristinna manna frá upphafi. Frá því á 17. öld tapaðist hún að nokkru úr vitund fólks en á 20 öld var farið að vinna að því að endurheimta þennan dýrmæta arf. Ein af þeim aðferðum sem þá litu dagsins ljós er Centering prayer - kyrrðarbæn en hún byggir á gamalli hefð sem lýst er í bókinni ´´The Cloud of Unknowing“ sem skrifuð er á 14. öld af óþekktum enskum munki.

Kyrrðarbænin er það sem Jesús átti við þegar hann talaði um „að biðjast fyrir“ í Fjallræðunni. Hann boðaði að: „nær þú biðst fyrir, skaltu ganga inn í herbergi þitt, loka dyrunum og biðja föður þinn sem er í leynum…“(Matt.6.6)
Í tímanna rás hefur þessi bænaaðferð verið nefnd ýmsum nöfnum eins og t.d. „pure prayer“, „prayer of the heart“, „prayer of simplicity“, „prayer of faith“ o.s.frv. ( Faðir Thomas Keating).

Kyrrðarbænin er einstök og persónubundin leið sem býr okkur undir það að vera opin gagnvart Guði. Hún er ekki beiðni til Guðs um eitthvað, né úrlausn spurninga eða slökunaræfing og henni er ekki ætlað að koma í staðinn fyrir aðrar bænaleiðir, heldur má segja að hún auki dýpt þeirra.

Lesa má meira um Centering prayer á heimasíðu Heilunarskólans www.heilunarskolinn.is